مع آخر كل فصل بتتقلب المواجع ومنحس أنو المادة اللي مأمنين فيا بحلقة بحث راحت
السبب هو علامات حلقات البحث غير المتوقعة بالمادة يعني بيضل الطالب كل الفصل عم يحضر ويعذب قلبو بالطلبات لحتى يصرلو دور بالآخر ويتكلف .. هي لو ما رجع مشان يغيرولو الحلقة لأنو ما عم يلاقي عنا شي :؟
يعني ببساطة لما منشوف شي علامة مقبلة من اللي ببالي ببالكن بشوية صفنة بيمرق من قدامنا الشريط الآتي :
1. مع بداية الفصل .. مندور ع الدكتور المناسب اللي رح يقبلنا عندو، وبجوز يغيّر رأيو ويقول أنو ما بيقبل غير فئتو بعد شي أسبوعين حضور
2. منلغي ومنغيّر وقت شي محاضرة لحتى نحضر حلقة البحث المقدسة
3. بعد جهد جهيد وانتظار طويل بيتكرمو علينا وبكلفونا - بس حرام الواحد يحكي اللي إلو واللي عليه في دكاترة بيعطونا حرية الاختيار - بس في منن بيصرّو ع الخيار الأول مشان ما ناخد شي حلقة جاهزة
4. البحـــــــــــــــــــــث المضنــــــــي ، وخصوصي أهل العربي اللي بينطف قلبن بالمركز الثقافي لحتى يدورو ع شقفة معلومة بتشبه عنوان الحلقة وممنوع استخدام النت والمواقع الإلكترونية لأنو قال مانو موثوق
5. وبعدا ع نقش وتلخيص وكتابة .. وبعد شي 3 أسابيع شغل : تبييض
6. الانتظاااار، يا بالقاعة يا عند باب مكتب الدكتور المتفضل علينا لحتى يسأل سؤال، يا أما من الحلقة يا أما برا الحلقة والخيار التاني هو الأقوى ومنجاوب والله متل العالم وحبابين
7. وبوقت الامتحانات وبعد التعب اللي تلخص بـ 6 نقاط ،(طبعا وما خفي كان أعظم ) منتفاجأ بعلامات ما بتشبه الجهد اللي صار يعني :
12 - 13 - 14 - 15 ، وبهالأيام بكون ممتاز جدا لو فوق الـ 15
وبأكد أنو حسب الدكتور .. لأنو في دكاترة ومعيدين بتعطي 17 و 18 و 20 كمان

طيب هون التساؤل
- انو ع أي أساس عم تحط يا معيد/ دكتور الـ 13 وما فوق ؟
- هل فعلا عم تقرأ الحلقة وتناقش الطالب ع الأساس المثالي اللي بيستاهل تحط هيك علامة ؟
- طيب عندك أدنى فكرة أنو عنا مادة حلقة البحث عم تكون متل القشة اللي بيتعلق فيا الغريق، وانت عم تسحب هالقشة مننا ؟ لدرجة انو مادة حلقة البحث عم تصير همّ لما عم نشوف العلامة الظريفة !!
- طيب ليش ما بتشرحلنا من البداية طبيعة تقييمك وتصحيحك ؟ ولو جرى هيك شي لا سمح الله هل عم تطبقو متل ما ذكرتلنا ؟
- ووين العبرة لما بتحطلي أنا الطالب اللي ما بتعرفني 14، وبتحط لطالب بتعرفو 19 حتى بدون ما يناقش ؟!!!

وبرجع وبقول أنو في دكاترة ببلو القلب وبخلوك متفائل لأنن فعلا عم يعطوك حقك بعد كل شي وقت وتعب عم تقدمو


لهيك منتمنى منكن يااااا معيد/ة ، دكتور/ة .. عم تعطي حلقة بحث:
- إنك تفكّر بالوقت اللي عم يروح مننا إضافة للحضور مشان حلقة عم نحاول من خلالا نضمن شي 15 علامة وما عم نضمن ناخد شي
- وأنو حدود علمنا المتواضعة ما عم توصل لحدود علمك فيا ريت تقدّر هالشي وتقدّر انو نحن عم نبذل جهد مانو قليل لحتى نوصل للمستوى اللي بيرضيك وبيرضينا بحلقة البحث


منتمنى نلاقي بالأيام الجاي تغيير طريقة تعاملك وتقييمك للأفضل
وبتمنى أنو كون وصلت صوت كتير من الطلاب اللي أكيد عم يعانو أكتر من اللي انكتب

هدى,

ما بتقصري بهالموضوع

انا وصلت لقناعة انو في حال كانت الاسئلة مأتمتة , و اسئلة حلقة البحث مأتمتة كسؤال بديل , لأ ما قدم حلقة بحث و روح اشلف اجابات بالفحص بالسؤال البديل , و هيك بضمن انو عم آخد ع الأقل حقي !

بستغرب انو فصل كامل عم نشتغل لحلقة البحث و كتير محاضرات منغيب عنها و منح كل الأولوية بالحضور لحلقة البحث مشان تسجيل الحضور , و وقت التديم كلكم بيعرف كيف الزحمات و الانتظار و الخربطة , و آخر شي يا دوب نجيب نص العلامة فيها ؟؟

ازا تغاضينا عن كلشي كتبتو سابقاً هلأ ,
سؤالي انو ليش نفس المادة عند معيد\ة علامات حلقة البحث فيها دائما فوق الـ 15 , و عند معيد تاني كلهم بين الـ 10 والـ 15 الا ما ندر ؟

بكل بساطة و شي طبيعي انو الخلل من المعيد\ة ... لأنو المعيد\ة هو اللي عم يتغير بوقت الطلاب هنن نفسهم

و في معيد معروف , و معيدة معروفة ... ما في داعي اوصفلكم كيف العلامات عندهم منذ تواجدهم بالكلية لهلأ ... خصوصا المعيد اللي صار يستلم مادة كاملة و لمين ... لطلاب السنة التانية اللي المفروض هلأ عم يتأسس و معلوماتهم لازم تكون الأفضل !!

بس قلكم شو .... هانت

سلام

يعني فيني قللك بهالفترة , إنك حطيتي إيدك عالجرح تماما..

مشكلة العملي وعلاماته وتقديمه و تحيز المعيدين و.... و ... مو بس بالآداب
السنة عانينا كتير من هالقصة ...
مابدي إحكي بالنسبة للشغل والروحة والجية بين معمل ومركز ثقافي ودكتور نفسي , و ورق ومقاييس وتوزيع وتقالة دم ناس وإحصائيات وتصوير وتمثيل ومراجع ودراسات سابقة لكل موضوع لا تقل عن عشرة ..

من بعض القرارات اللي عم تطبق عندنا رح أبدأ من القديم للجديد :
أول شي علامات العملي ما بتنزل بيوم واحد كلها سوى , بتنزل كل علامة مادة بيوم إمتحان المادة , عأساس منشان الطلاب ما يأمنوا إنه علامتهم بالعملي جيدة ويدرسوا ويطلعوا على نص المقرر حتى يأمنوا النجاح
إحتمال بإيدهم حق ,بس الطالب اللي رح يشوف علامته مثلا (19) من (30) كيف رح يدخل عالإمتحان بنفسية مأدركة تماما إنه (11) علامة طاروا ولسّة ما لمس ورقة الإمتحان , وأكيد لو كان شاف هي العلامة قبل كان تجهيزه اختلف عن تجهيزه وقت بيعرف هي العلامة

أما تاني قرار :
فهو ممنوع يعطى الطالب أكتر من 26 من 30 , فكرنا بأول الأمر إنه إشاعة , بس بعدين بالفعل اتنفّذ هالقرار , والعلامات موصلة للـ 18 من 30...
والطالب اللي بيحصل على علامة فوق ال26 , بتنعمله على أساس لجنة بتناقشه بموضوعه وهل هو فعلا بيستحق هالعلامة اللي اخدها
وتفاديا للمعيدين ما يوقعوا بهاللجنة ويعلقوا مع رئيس القسم , فما في ولا معيد إلى الآن اتجرّأ وعطى هيك علامة , مع إنه وللحقيقة بينوجد شغل رائع بكل ما تحمله الكلمة من معنى

ونحن مو متل عندكم إنه مثلا لو راحت علامة العملي , في سؤال بديل , خلص أو بقدّم الطالب المادة من 70 و30 علامة بكون عاملهم باي , أو إنه حسب المادة ممكن إنه ينفصل منها وما يحقله يقدمها حتى يحضر ويقدم بحث العملي

طبعا عدا تحيزات بعض المعيدين والمعيدات , عندنا كل يوم بتغيبيه بترحلك علامة , وهالشي بيطبق على طلاب وطلاب , وحتى لو كنت أنا من المستفيدين من هالشي , بس الحق يقال غيري انظلم
واللي بضحك وقت المناقشة مافي قاعة تلمنا , السنة في زمرة راحت ناقشت بقاعة بكلية العلوم , وزمرة ناقشت بالشارع , والفصل الماضي الساعة خمسة بالشتوية ناقشنا على ضو الجوّال , لأنه ماكان في كهربا ..
ورغم إنه لسّة في كلام كتير , بس شو بده يحكي الواحد ليحكي [/size]

صمت القوافي, والله جبتا .. لازم أهتم بمزاجو كتير ، وإذا كان قبلو طالب معصبو فمعناها راحت عليي انا 4 .. خبرة عميقة وطويلة
بكرا بالرابعة بتشوف قد الـ 3 سنين اللي مرو عليك وبتترحم
إضافتك كانت مميزة فعلا .. بشكرك

فارس, هي لو كانت مأتمتة متل ما ذكرت .. ولو لقيت فعلا وقت لتحلّ لأنو بكونو حاسبين الوقت بدون أسئلة الحلقة عنا
ولو ما كانت مأتمتة .. فيا ما بتتصلح يا ما بتتصلح بالزبط .. ولأنو لو تغير المعيد على هالمادة الطلاب رح يجيبو علامات غير اللي عم يجيبوّا عندو هاي هي .. عم تهوووووون .. خصوصي أهل الرابعة
شكرا لتعليقك مدير

بانة,
ما بتتخيلي قدي ردك كان عم يغني الموضوع .. يعني فعلا اللي بشوف مصيبتو بتهون عليه مصيبة غيرو
انو شو مشان هـ(الشقا) ؟ لأ وصدمتيني وقت عم تحكي انو بيعملو اجتماع لو أخد الطالب 26 يعني والله مامستحيل أنو الطالب يكون شغلو فعلا منيح وبيستاهل هيك علامة شر البلية ما يضحك .. لأ نحن ما وصلنا لهون، بس ترى شوي شوي ما بعيدة نكون قطعناكن لأنو فعلا وقت المناقشة وقت شي محاضرة بنفس القاعة بكونو بنفس الوقت .. وتعي شوفي الطابق كيف بيقوم وبيقعد مشان نلاقي قاعة فاضي نكمل فيا مناقشة
طبعا وفيكي تقولي انو عندكن تمييز عنصري رهيييب .. وخلينا ساكتين
نورتي بانة

ZiNA, جد مشكلة .. لأنو التحضير للمناقشة الجماعية بتختلف كتيييير عن المناقشة الفردية لأنو فيا شغل اكتر وتوسع بنقاط اكتر
قولي عنا بالعربي بيراعو هالشي لأنو قليل الطلاب اللي بتناقش جماعي وبتعمل بريزنتيشن للأسف .. والأغلبية هيك عم يصيرو .. يلا ان شالله بتعوضي بالمادة النظري
وشكرا لتعليقك

شفته للطابق
..
مرّة كنت بالآداب , غيّرت الجهة اللي بدي إطلع منها كلها منشان هالشوفة , لا والحلو مستحيل تقدري تمرقي , أنا وقتها سألتهم خير انشالله شوفيكم قالولي ولا شي مناقشة مناقشة , قلتلهم : إي موفقين لكن شو مشانك؟؟؟ انقلب المثل , انا بعرفه هيك : اللي بشوف مصيبة غيرو بتهون عليه مصيبته ..
على كل عنجد خليها تهون , صدقي نحن تمسحنا , بالعكس ياما متقلعين ومتشرشحين بس كله مناخده بالضحك شو بدنا نعمل

بانة,
اي منيح .. معناها عاينتي موقع الجريمة (موقع مناقشة الحلقات ) بأم عينك لك اي والله
معلش بس كنت لسه مصدومة من نتائج الحلقات فعلا .. لأنو ما رح يتصلح شي عاد خلينا كووووول