آرتين لتعليم اللغات :: انا kma ويلي بيعرفتي بيجهلني

آرتين لتعليم اللغات https://www.forum.art-en.com/

انا kma ويلي بيعرفتي بيجهلني https://www.forum.art-en.com/viewtopic.php?t=26130	صفحة 1 من 2

الكاتب:	kma [ الجمعة ديسمبر 02, 2011 8:21 am ]
عنوان المشاركة:	انا kma ويلي بيعرفتي بيجهلني
أول شي مرحبا... انا أسمي kma 90 بالميه منكم ما بيعرفني...بس رجلي رجعتني على هالمنتدى ....لأنو قضيت فيه أحلى أيام وأحلى رحل واتعرفت فيه على رفقة... الزمن باعدنا بس بالقلب محفورين (مو بالضرورة المعرفة الشخصية) بس حبيت أعرف وين صرنا ومين بقي...شو صار بفارس وصرامتو وطيبتو بنفس الوقت... شو صار بعصام الوسوفي الألماني الحمصي بسمة المنتدى...شو صار بعبد الرحمن بعد سفرو عالسعودية..وحقق حلمو أو لأ...شو صار بلجين بلمستها الحلوة شو صار بسنا وملاك وجدها وشو دخلت كليه؟ وتاج وعاشقة العربية ولو اني بتذكر أنو غيرت أسمها ...شو صار بعبادة ولينة ومايا ووداد...شو صار بأوركيدا والملاك اللي الها تواجد وعميد كلية الحب والثنائي أسامة وعامر شو صار بالشاعر ابراهيم ووسام وعلاء و الثنائي الدالي وقصصهم مع الأراكيل شو صار بفلك والدكتورة ربا وزمردة وصفوت ...مون دانسر ..يارا...ومشرفة الرياضة هبة(سابقا)...والمهندس فراس...شو صار شو صار شو صار ..ولسى في كتير بس الذاكرة الها حدود يمكن ما ضل حدى منكم هون بس حبيت أعرف أخباركم... بتتذكروني؟؟ بتتذكرو الجزرة ومعاناتها مع الزراعة بتتذكرو حلم حياتها وقصتها مع سفرة أهلها وبيتها بحلب؟............ بصراحة أكتر موضوع تذكرتو كيف كان يومك وهلق أنت راضي عنه...اتذكرت أيام الجرايد يلي كنا نكتبها..تذكرت الأيام ورغم المعوقات كنا نقلبها مزح...رجعت هلق قريتها كلها تقريبا..اتمنيت أعرف شو صار مع كل واحد منكم.. حبيت كمل بهداك الموضوع بس قلت قبل خليني أتأكد لسى في حدى من يلي بعرفهم هون؟؟؟ ولسى عندكم روح أيام زمان ولا الزمن غيّرنا

الكاتب:	Safwat [ الجمعة ديسمبر 02, 2011 5:36 pm ]
عنوان المشاركة:	انا kma ويلي بيعرفتي بيجهلني
kma, أهلا و سهلا بعودتك فعلا كانت ايام كأنها مبارح و مبارح كلنا طلاب و اغلبنا صاروا اليوم أساتذة فارس الرائع عشت معو فترة بالشام و كانت ذكريات معو لا تنسى عصام أخيرا تخرج و تغير شوي ثائر اعتلى قمة من قمم ارتين ابداع ارتين بالأمسيات الشعرية الحلوة و من سنة تقريبا فرحنا فيه كممثل بمسرحية حضرناها و كانت يمكن أكبر لقاء آرتيني و في النا صورة حلوة نحنا الشباب اجتعمت فيها أغلب الأسماء اللي ذكرتيها في اسماء اختفت و في اسماء جديدة ظهرت و قدمت ابداعاتها في عالم اعتبرت حالها ختيرت و هن بعز الشباب ..... بالنسبة الي تخرجت و اخدت دبلوم ترجمة و قريبا حاحتفل معكم بأول كتاب الي تعليمي للأختصارات باللغة الانكليزية و حتشوفوا بالمعارض و المكتبات اذا الله راد و لسا بحب ارتين و بعتبروا واحة المبدعين و النخوجية و الكفو و الخ .... موضوعك نعنش الذكريات .....شكرا الك

الكاتب:	sponge7bob [ الجمعة ديسمبر 02, 2011 5:50 pm ]
عنوان المشاركة:	انا kma ويلي بيعرفتي بيجهلني
welcome back whoever u r

الكاتب:	فارس [ الجمعة ديسمبر 02, 2011 7:02 pm ]
عنوان المشاركة:	انا kma ويلي بيعرفتي بيجهلني
kma, لك لك لك ... هاد انت هون ؟ يا ميت ولكم بخالد ! و عاش مين شافك والله .. بس أنو عم تقول اللي بيعرفني بيجهلني .. كيف اللي ما بيعرفك ؟ والله بهال كم كلمة اللي كتبتهم رجعتني كم سنة و تذكرت الف قصة و قصى .. سبحان مغير الأحوال .. لأنو الاحوال أكيد تغيرت .. و كل زمن الو طعمتو .. أصلا الذكرى ما بتصير حلوة لومانها ذكرى .. بس ان شاء الله بيجي اليوم اللي رح نتذكر فيه كلشي و نجتمع بشي رحلة ومثلا ..

الكاتب:	عصام [ السبت ديسمبر 03, 2011 12:30 pm ]
عنوان المشاركة:	انا kma ويلي بيعرفتي بيجهلني
ابو الخل الغالي والله زماااااااااااااااان وايام من ناحيتي اخباري صارت عندك عبد الرحمن انا اللي كنت معاه خطوة بخطوة بعد عني بقا كيف عن ارتين والله يوفقو يارب ملاك فاتت انكليزي وصارت سنة 4 تاج عطتك عمرها يبدو لانو اختفت عن المنتدى بشكل كامل عبادة اتخرج هالسنة وفلك سنة تالتة صارت والثنائي ابو السيم وعامر كل مين راكض بحياتو هون وهون مابقا فضو يحكو راسن الشاعر ابراهيم عسكري وعلاء صار ببريطانيا عم يكمل دراستو ووسام سجل ماستر هلق ومتل ما قال فارس انشالله شي رحلة تجمعنا ونكون خلصنا من كل هاللي عم نشوفو ونعيشو ايــــــــــــــــــــــــه عرحلتنا الاخيرة والله كانت حلوة فتحت عصورنا هلق شفتن Safwat, اقتباس: عصام أخيرا تخرج و تغير شوي حاسسك كنت شايلني عظهرك وماشي حتى تقول واخيرا اولا ماكان ببالي ابدا انو اتخرج ولا كنت بدي وتانيا معقول مابدك ياني اتغير والبلد عم ينحرق ابو ابوه في شي اسمو ناموس واحساس وتقدير للي سقو بدمهم ارض هالبلد عكل حال بيشرفني كون متغير وما فوت قضيها كتابة اغاني ورسايل عشق وغرام وشوق وغيرو وغيراتو بكل شوي ولا كأني عايش بحمص وهاللي عم ينقتلو نكرات ما بيستحقو اي رد فعل ولو بسيط ... الكلام يطول ويطول وعالفاضي بس عفوا منك مافي داعي الو

الكاتب:	Odysseus [ الأحد ديسمبر 04, 2011 12:06 pm ]
عنوان المشاركة:	انا kma ويلي بيعرفتي بيجهلني
kma أهلا بخالد والله .. حلوة رجعتك بهاد الموضوع .. و كأنو شخص راجع و مرجع الماضي معاه .. بس للأسف الماضي مستحيل يرجع .. حتى لو كان حلو .. حلنا الوحيد هو انو نخلي الحاضر هو ماضي المستقبل الحلو .. و عم تسأل اذا متذكرينك؟ بتتذكر الرحلة الي قعدنا فيها مع بعض طول الطريق بالبولمان؟ أنا بتذكرا منيح .. و في صورة الي والك بقلب البولمان مع بعض .. انا الي بتذكرو انو هي الرحلة كانت من أحلى الرحل الي رحناها .. متل ما قال عصام .. أنا هلق بكولشيستر ببريطانيا عم كمل دراستي .. و ماني ناوي طول ان الله راد .. يعني بريطانيا مانا شهوة هلق أنا اقتراحي بقا انو انت تخبرنا شو عمل فيك الزمن .. و شو صار معك بكلية الزراعة .. و شو عملت فيك الحياة .. خبرنا عنك

الكاتب:	العربية [ الأحد ديسمبر 04, 2011 3:12 pm ]
عنوان المشاركة:	انا kma ويلي بيعرفتي بيجهلني
kma, مين kmaمين kma ولو إنو ما انذكر اسمي هون بس حبيت قلك بعد زمان والله!! أكيد في شي غلط!! إنو كيف هيك خطر آرتين عبالك بجد أعضاء آرتين المخضرمين القدامى الهن وقع خاص بقلب آرتين ...وأهلا وسهلا فيك من جديد تخرجت ولا لسا الله يرحم إيام كنت تحكيلنا عن معاناتك بكلية الزراعة لاتطلع على تاريخ اشتراكي أنا مخضرمة بآرتين بس مغير عندي تاريخ الإشتراك (فاتن ) أكيد صار إسمي في سجل النسيان ونورت مرة تانية اخي خالد

الكاتب:	عاشقة العربية [ الأحد ديسمبر 04, 2011 4:39 pm ]
عنوان المشاركة:	انا kma ويلي بيعرفتي بيجهلني
هلاااا kma حدا بينسى الجزرة؟ حدا بينسى معناة كلية الزراعة؟ صحي شو صار معك؟ تخرجت ولا لسه؟ انا بخير وأهم غنجازاتي لهلأ اني متخرجة .. ولسه في كتير خطوات ما اكتملت.. ما منعرف شو مخبي الزمن، ان شالله يكون المستقبل قد أحلامنا. نورت وفرحنا برجعتك

الكاتب:	kma [ الثلاثاء ديسمبر 06, 2011 8:04 pm ]
عنوان المشاركة:	انا kma ويلي بيعرفتي بيجهلني
Safwat, أهلا وسهلا فيك صفوت بس أول شي انا شب واسمي خالد وموفق انشاء الله بكتابك وبتعتلي قمة من قمم الإبداع sponge7bob, thanks فارس, أهلا وسهلا فيك أبو الفوارس...والله متل ما قلت الأحوال كتير تغيرت ولهيك حبيت أكتب هالموضوع لأعرف شو آخر الأحوال ...انشاء الله عخير وانشاء الله يكون مستقبلنا أحسن من ماضينا وحاضرنا عصام, عراسي يا أبو وسام قول انته الى حد ما متابع أخبارك...بس خفف شوي وروووووء ما شاء الله الكل تخرج وسافر أو عم يعمل ماجستير وما ضل بالميدان غيري Odysseus, أهليييين بعلاء أكيد الماضي ما رح يرجع ولو أنو منتمنى ترجع اللحظات الحلوة يلي فيه وأحيانا الحاضر بكون مو بأيدنا ......الحمد لله وكانت أحلى رحله بوجود الشباب ...وبتمنى تبعتلي هالصورة واذا في غيرها..لأنو كان مصدري للصور هو عصام وبعتلي كم وحدة وخلص وموفق انشاء الله ببريطانيا والله يبعتلك الخير بالنسبة الي انتقلت عحلب من 3 سنين بعد صراعي الطويل يلي دام 4 سنين بالأولى والحمد لله مسكة الخط بحلب ومن سنة لسنة بحمل مادة أو تنتين وهلق صرت سنة رابعه ولله الحمد العربية, والله يا فاتن الذاكرة بتخون ببعض الأيام واذا بتقري بتلاقي أنو قلت لعاشقة العربيه بأنو غيرت أسمها بقى يمكن القصد كان عليكي أو انا ضيعت..لأنو الأسماء متقاربة عكلن شكرا الك انو لسى في الي فسحة بسجل النسيان عندك... اما انا فانتقلت عجامعة حلب بعد صراعي الطويل بحمص...وصرت هلق سنة رابعه والحمد لله عاشقة العربية, بالنسبة الي صرت رابعه ...بس بحلب وباعتباري بحلب بقى معتبر حالي متخرج بس مع وقف التنفيذ...لأني خلصت من تعقيدات الدراسة بحمص ... وألف مبروك عالتخرج ولو انو متأخر وانشاء الله بتحققي كل أحلامك... وشكرا الكم جميعا رجعتو الي شوية أمل بزمن خاني فيه

الكاتب:	زمردة [ الثلاثاء ديسمبر 06, 2011 11:00 pm ]
عنوان المشاركة:	انا kma ويلي بيعرفتي بيجهلني
kma, أهلين أخ خالد بما انه انذكر اسمي ما قدرت إلا ما رد وأثبت وجودي ... موضوعك رجعنا بالذاكرة لأيام الرواق والنشاط بآرتين ... الأيام عم تمضى وعم نكبر وتكبر مسؤولياتنا وطموحاتنا وأحلامنا معنا ... وحتى اهتماماتنا عم تتغير بما يناسب المراحل اللي عم نمر فيها بهالحياة ... ومع هيك دائما بكون لآرتين محطة بيومنا أكيد منتذكر الجزرة ومنتذكر مقولتك الشهيرة اللي كانت على ما أذكر "حلمي أن أتخرج من كلية الزراعة وأنا بكامل قواي العقلية" أنا اتخرجت كمان وعم اسعى في مناكبها والحقيقة تقال من بين الاشخاص اللي فقدهم آرتين بجد وما عد عرفنا أخبارها هيي "سنا" بالتوفيق إن شاء الله

صفحة 1 من 2	جميع الأوقات تستخدم التوقيت العالمي+03:00
Powered by phpBB® Forum Software © phpBB Group http://www.phpbb.com/