هدى شكرا عالموضوع
انا ليوم شفت هالنوع من الباصات بس للاسف لسا ما جربتن وبهيك حالة ما بحسن احكم بس اللي عرفتو انو التعرفة 15 ليرة زهاب واياب .

يتمتع بلدنا بالخطط الخمسية والطبخات على النار الهادية لكن تتميز محافظتنا العظيمة بعنصر المفاجئة والقرارات الحاسمة .. نفذ ثم اعترض
كان المرور في حمص أفشل مرور في سوريا .. والأن نال الجائزة الذهبية على مستوى الأرض والكواكب المجاورة ..


موضوع جميل لنتعرف معاً على الفرق ما بين كلمة : نظرياً و كلمة عملياً

نظرياً

وأخيراً تخلص كوكبنا اللي حكينا عنو من جزء ولو بسيط من التلوث وارتحنا من الطلعة وخبطة الراس بالباب وقرفة الضهر وقت النزلة .. وتكسير الركب من المقاعد القريبة من بعضها وبعد اذنك ممكن تعطيه عشرة .. قديش ؟؟ واحد !! لأ سبعة ورجع الباقي وسكر الباب وراك ....الخ الخ

عملياً

الباصات الجديدة هلأ جربتها لأول مرة اليوم بعد العودة من المسابقة ..بعد نطرة أكتر من ربع ساعة مرق الباص ومشي وما عرفنا لوين بيوصل لأن اللوحة مكتوبة بقلم رصاص على ما يبدو .. اجا التاني وبدأت الرحلة
طبعاً واضح انو مستعملة ومعاد تطبيقها على ما يبدو من صوت المحرك المهتري وسيئة جدا جدا من حيث الراحة (حتى اللي لونهن أخضر أفضل بمية مرة) ..
يبدو أنو مافي شي اسمو مركز حتى الأن .. مانهن أوتوماتيك .. شو يعني ؟؟ يعني انو كل ما بدو يوقف ويمشي بدكن تنسو الموضوع شي مية متر اقلاع ومية متر ليهدي والمواقف مانها معروفة حتى الأن ... على بركة الله نسير وجرب لنشوف شو بيطلع معنا .. معظم طرقات حمص الغير رئيسية ضيقة ومانها مهيئة تماماً لباصين وأي شي معن مما رح يأدي مع الأسف لحوادث بالجملة عن اللفات الضيقة (الله يستر) نزلني عاليمين ونزلها ما انحلت يعني .. !!

وأهمممممممممممممم شي
الله يعين الللي انقطعت رزقتن أكتر من 2000 شوفير سيرفيس





متل العادة بانتظار التعديلات أو بالأحرى الدراسة المتأخرة للموضوع اللي كان لازم تنعمل قبل بكم سنة زمان

ما عاد تفرق معي ..
بصراحة ما عندي شي احكيه لحتى جرب .. و اكيد التنين لازم اطلع بكير على الكلية
لانوا على حسب اجتماع الشوفيرية الحموية صار تعميم لازم نطلع من الساعة 6
مبدأيا لنشوف شو الوضع ..

والله مو خبرية ... يعني كنا ب20 دقيقة من الكراج للجامعة على هالحالة رح نطلع قبل الفجر
تذكرت الباصات التحفة الي عنا بحماه لا بولمان ولا طلّ الخبر .. لا وأحلى الشي أنو مكتوب عليهن "إكسبريس"

لا حول ولا قوة إلا بالله
مشكورة هدى

فــلـك,
أنت بتدفعي حق الروحة والرجعة 15 بفرد مرة وبأمنو عليكي

غانم,
بس تجربن رح تقدر تحكم منيح .. جد الله يرحم أيام السرافيس

Mohammed, مقدمة مناسبة جداً وحقيقية لما يحصل معنا
هذا ونحن منطقة وسطى تمر بشوارعنا كثيرٌ من الرحلات والأسفار أضيف ..
تخلصنا من زحمة الشوارع ، اللي فعلاً فضيت من زحمة السرافيس واللي بيصف ع اليمين لينزل راكب وبيرجع بوف بعد شوي ليطالع واحد وكلو فجأة .
يعني هي إيجابية لصالح الباصات لأ ومن كبر الباص ما رح يسمع ، لهيك بدو الواحد يعيّط ليمشي الحال وبصيرو البنات بوكلو حدا يحكي عنن

المزعج جدا جدا بالموضوع ..
أنو بكرا ع الدوام والزحمة جد الوضع رح يكون مزري ، بالنسبة إلي نزلت قبل بيتي بمنيح لأنو ما عاد اتحمل الزحمة ..
والشباب رح يقضوّا وقفين لأنو خلو البنات يقعدو مكانن
والواقفين بالزحمة اكتر من القاعدين ومن ايمت طريق الشام فاضي ؟ لذلك اللي عم ينزل ع الجامعة كل نهار ويرجع عن جد رح يعاني جوا الباص كتير هدول اللي ما عم يروحو من بالي

بشكر مرورك جداً واللي أضاف بصمة حلوة بالموضوع


Obada Arwany,
فعلاً بدك تطلع بكير لحتى تخلص من الزحمة شوي .

safa,
الباصات الخضر ما كنت اطلع فين
بس شو مشان التكاسي ؟ يعني كل نهار تكسي مشكلة

Raghad,
اي جد مانا خبرية أنا انزعجت وقت دريت ولساتني مع السرافيس رغم كل المساوئ .....

نورتي رغد

ابراهيم محمد,
أهلا أهلا
ان شالله يقدرو يتلافو الخطاء لحتى نحاول نترقى شوي بموضوع المواصلات اللي هو أكتر موضوع بيهم الناس لتتواصل مع اماكن الإقامة والعمل والدراسة .

هدى,
أنا اركبت فيه و على حسب ما افهمت انو بتقطعي كرت و طبعا مكتوب عليه تاريخ اليوم ... يعني أذا اركبتي فيه مرة تاني بنفس اليوم بياخدو الكرت منك و ما بياخدو مصاري ..انو على مبدأ الذهاب علينا و الاياب عليهن
بس انا عجبتني الفكرة عالاقل كل شخص عندو مقعد مستقل و الله شي ممل ركبة السربيس العادية:? و عالاقل صار الواحد يلاقي سربيس بسرعة اكتر